lipu pi jan Telakoman

Project maintained by joelthomastr Hosted on GitHub Pages — Theme by mattgraham

tomo > lipu ni

toki pi+kon+pona

kalama+sin nanpa luka luka wan la mi toki e pilin mi. sewi la sina ken kute e toki mi lon sitelen+tawa. lipu ni la sina ken lukin e sitelen pi++toki mi lon sitelen+tawa ni. mi pona lili e toki pakala mi.

toki! mi jan TELAKOMAN. mi kama sona e toki+pona lon tenpo+suli. mi open e kama+sona mi lon tenpo+sike pini luka wan anu luka tu. mi sona+pona ala.

toki+pona li pona tawa mi tan ni: mi jan pi ante toki. ante toki li ni: mi lukin e lipu nanpa wan, mi sitelen e kon pi+++lipu nanpa wan lon lipu nanpa tu kepeken nasin toki ante. ni li pali mi. pali ni li pona+mute tawa mi.

ante la sona+toki li pona+mute tawa mi. mi wile kama sona e ni: seme la nimi li ken pana e kon? tan seme la kalama pi++uta mi li ken pana e pilin mi tawa pilin sina? sona li seme? sona seme li lon insa nimi? lawa+jan li sona e nasin toki tan seme? lawa+jan li kama sona e nasin toki sin kepeken nasin seme? ale ni li wile+sona suli tawa mi. mi pilin pona tan alasa sona ni.

mi kepeken toki+pona pi lipu+pu. ni li nasin mi pi toki+pona, taso nasin ante li ike ala tawa mi. mi kepeken nasin pi+lipu+pu tan ijo tu:

nanpa wan la mi wile e ni: jan ale li sona e kon pi++toki mi. nanpa tu la toki+pona li kepeken nimi pi++mute lili. mi kepeken toki+pona tawa alasa sona ni: nasin toki li kepeken nimi pi++mute lili la seme li lon? wile+sona ni la nimi+sin li wile ala. nimi+sin li ike tawa wile ni. mi wile kepeken nimi pi++mute lili tawa pana+sona! taso lon la nimi+sin li ike ala tawa mi. ni taso li lon: nasin pi++wile+sona mi la mi wile ala kepeken nimi+sin.

tenpo ni la mi wile toki e ni tawa sina: mi pali e kulupu pi+sitelen+tawa lon ma+kasi. ken la sina lukin e sitelen+tawa ni. nimi ona li “toki+lili lon ma+kasi”. mi wile toki e ni tawa sina: mi pali e sitelen+tawa ni tan seme? mi kepeken nasin seme lon sitelen+tawa ni? sina ken pali e sitelen+tawa sama sitelen+tawa mi kepeken nasin seme?

sitelen+tawa mi li kepeken nasin seme?

sina ken lukin e kulupu pi sitelen+tawa mi lon ma JUTU. nimi kulupu li “toki+lili lon ma+kasi”. sitelen+tawa lili mute li lon kulupu ni. sina ken lukin e sitelen ale ni lon tenpo+lili. ilo+tenpo la sina kepeken tenpo+lili pi mute ni: mute luka luka anu ijo sama ni. ni li tenpo+lili a! tenpo+lili ni la sina ken lukin e sitelen+tawa ale pi++kulupu ni.

sitelen+tawa ni la mi pana e lukin ni tawa sina: seme li lon ma+kasi? sina lukin e kasi+suli e telo+suli. mi pali e sitelen+tawa ni lon tenpo pini. tenpo ni la kule pi+lipu+kasi li ante li kama jelo li kama loje. ale li pona+lukin a. sitelen+tawa la mi toki e ale ni kepeken toki+pona.

ijo ante pi+sitelen+tawa ni li ni: mi toki kepeken toki+pona, taso sina sona ala e toki+pona la sina ken sona e kon pi++toki mi. ni li tan seme? ni li tan ni: mi pana e sitelen+lili lon sinpin pi+sitelen+tawa. mi kepeken sitelen+lili mute, mi o toki e sitelen+lili wan: mi toki e telo kepeken toki+pona la, sina lukin e sitelen telo lon sinpin pi+sitelen+tawa. ni la sina wile ala sona e nimi “telo” pi+toki+pona. sina sona anu sona ala e nimi telo la sina sona e ni: mi toki e telo.

ken la sitelen+tawa mi li musi+mute tawa sina anu suwi lukin tawa sina. taso ni li nasin suli pi+pana+sona pi+++nasin toki sin: toki pi+kon+pona.

jan li kama sona e nasin toki kepeken nasin seme?

toki pi+kon+pona li seme? mi o open lon open.

jan li wile kama sona e nasin toki sin sama toki INLI anu toki LOSI anu toki SONKO anu toki+pona la jan li wile kepeken nasin seme?

tenpo+pini la tenpo+suli la jan mute li kepeken nasin sama ni: jan li lukin e lipu pi+++nasin toki sin. lipu li pana e sona pi++nasin toki. “nimi ni li sama nimi ni pi++toki sina. nimi ni li sama nimi ni pi++toki sina. sina kepeken nimi la o kepeken nimi ni lon open, pini la o kepeken nimi ni.” lipu li pana e sona ni pi+++nasin toki sin tawa sina. jan li kepeken tenpo+mute li kepeken wawa lawa mute tawa ni: ona li kama sona pona e sona ale pi++lipu ni.

jan li ken kama sona e nasin toki kepeken nasin ni anu seme? lon, taso nasin pi++sona ni li ken ike tawa wile. jan li kama sona e nasin toki la ona li wile e seme? ona li wile e ni: ona li kepeken nasin toki kepeken ala tenpo+mute kepeken ala wawa lawa. ona li wile e ni: ona li pilin e ijo la ona li ken toki e ni lon tenpo sama.

jan li kama sona e nasin toki tan lipu la ona li sona. taso ona li wile kepeken nasin toki la ona li wile kepeken tenpo+mute li wile kepeken wawa. ona li toki insa e ni lon tenpo ale: “nimi ni li nimi seme? nimi seme li wile nanpa wan? mi kepeken nimi lon nasin ni la mi wile ante e kalama lon nasin seme?” ona li wile toki insa mute.

tenpo+pini la jan+sona mute li toki e ni: lon. kama+sona pi++nasin toki tan lipu li wile e wawa lawa mute. taso sina kama sona pona la tenpo+mute la sina kama pilin e toki. sina kama pilin la sina ken toki kepeken ala wawa mute kepeken ala tenpo+mute.

taso kulupu ante pi jan+sona li lon. jan wan tan kulupu ni li jan KASEN. (nimi ona lon toki INLI li ni: “Stephen Krashen”). jan KASEN en jan+sona sama ona li toki e ni: nasin toki la nasin ni pi+kama+sona li ike. jan li ken ala kama pilin tan kama+sona.

jan li kama sona e nasin toki tan toki pi+kon+pona

ni li nasin ike pi+kama+sona la nasin pona li seme? jan KASEN li toki e ijo tu.

nanpa wan li ni: kama+sona en kama+pilin li ante. jan li kama sona e nasin toki la ona li pilin ala e nasin toki ni. jan sama ni li ken toki e ijo+mute pi nasin toki. taso ken la jan li ken ala kepeken nasin toki ni. ante la jan li ken kama pilin e nasin toki kepeken ala sona.

o lukin e toki+mama sina. sina pilin e toki+mama sina. ni la sina kepeken toki+mama sina kepeken ala wawa mute. taso ken la sina sona ala e nasin pi++toki sina. ken la mi toki e ni tawa sina: “toki+mama sina la nimi ni li pona, taso nimi ni li nasa. nimi+nasa ni li nasa tan seme?” ken la sina sona ala e ni: nimi+nasa pi++toki sina li nasa tan seme. ken la sina toki e ni: “mi sona ala, taso mi kepeken ona.” lon, sina ken kepeken nimi+nasa tan ni: sina pilin e ona.

toki INLI la kama+sona li “language learning”, kama+pilin li “language acquisition.”

jan KASEN li toki e ijo tu. ijo nanpa tu li ni: jan li kama sona e nasin toki sin kepeken nasin wan: toki pi+kon+pona.

toki pi+kon+pona li seme? toki pi+kon+pona la sina sona pona e kon, taso sina sona ala e nimi ale.

sina sona ala e nimi ale la sina ken sona e kon kepeken nasin seme? ken la sina sona ala e nimi wan, taso sina sona e nimi ante ale. ni la sina ken pilin e kon pi nimi pi+sona+ala.

ante la sina ken sona e kon tan ijo pi+toki+ala. insa pi++ lawa sina la o lukin e ni: jan li kama tawa sina. ona li toki tawa sina lon nasin toki ante. sina sona ala e toki ona. taso sina lukin e ni: kon li seli. jan ni li pilin ike. ona li open e uta ona. sina kute e kon lon uta ona. palisa luka ona li tawa uta ona. ona li wile e ni: sina lukin e uta ona. uta ona la telo li lon ala. ni la sina pilin e kon pi+toki pi++jan ni. kon li ni: “o pana e telo tawa mi.” sina pilin e kon pi+toki pi++jan ni.

ni li toki pi+kon+pona. toki pi+kon+pona la sina sona ala e nimi ale, taso sina sona e kon tan nimi+ante anu sona+ante. jan KASEN li toki e ni: jan li kute e toki pi+kon+pona la jan li kama pilin e nasin toki. ante la jan KASEN li toki e ni: nasin ante li lon ala. jan li ken kama sona pona e nasin toki, taso ni li kama+pilin ala. jan li kama pilin e nasin toki sin kepeken toki pi+kon+pona taso.

nimi pi toki pi+kon+pona lon toki Inli li ni: “comprehensible input.”

sina ken pali e sitelen+tawa sama sitelen+tawa mi

a, mi toki e ijo mute! taso mi pilin e ni: tenpo ni la sina sona e ni: mi pali e sitelen+tawa mi tan seme? mi pali e sitelen+tawa mi tawa ni: mi wile pana e toki pi+kon+pona tawa jan+sin pi+toki+pona.

mi pali e sitelen+tawa la mi toki insa e ni: jan+lukin li sona ala e toki+pona la ona li ken ala ken sona e kon pi++sitelen+tawa mi?

mi o toki e ijo+musi tawa sina: tenpo+mute la mi pali e sitelen+tawa sin. mi la sitelen+tawa ni li pona. taso mi pana ala e ona tawa ma JUTU lon tenpo ni. nanpa wan la mi tawa poka pi++meli mi, mi toki e ni tawa ona: “o lukin e sitelen+tawa ni. sina sona e kon anu seme?” mi pali e ni lon tenpo+mute. mi pilin anpa lili tawa meli mi. mi wile ala e ni: meli mi li pilin ike tan ni: tenpo ale la mije ona li pana e sitelen+tawa nasa tawa ona! ona li olin mute e mi a, tenpo ale la ona li lukin e sitelen+tawa.

tenpo mute la mi pana e sitelen+tawa sin tawa meli mi la meli mi li lukin li toki e ni tawa mi: “mi sona ala e kon pi ijo+wan anu ijo+ante.” mi pilin ike lili, taso mi ante lili e sitelen+tawa. mi pana e sitelen+tawa sin, anu mi ante e sitelen lon sinpin pi+sitelen+tawa. pini la mi pana sin e sitelen+tawa tawa meli mi. kon li pona tawa meli mi la mi pana e ni tawa ma JUTU.

toki pini

mi wile toki e ni tawa sina, pini la mi toki e ni: sina ken pali e sitelen+tawa sama sitelen+tawa mi. ni li wile tawa jan+sin pi+toki+pona. ijo+suli li ni: jan li sona ala anu sona lili e toki+pona la jan ni li sona ala sona e kon pi++toki sina tan ijo+ante anu toki+ante pi++sitelen+tawa sina? sitelen+tawa pi+kon+pona li kama mute la ni li pona+mute tawa jan+sin.

2021-12-05 la mi ante e lipu ni. tenpo kama ona la mi ante ala.