lipu pi jan Telakoman
Project maintained by joelthomastr Hosted on GitHub Pages — Theme by mattgraham
| sitelen Lasina | sitelen-pona | sitelen pona pona | sitelen telo | Literal English |
tomo > lipu ni
wawa ante pi tokipona
mi pana e lipu ni lon lipu tenpo nanpa pan
lipu tenpo nanpa mun la mi toki eni : tokipona li sama ala sitelen SONKO li sama sitelen LASINA. ni li tan ni: tokipona li jo ala e nimi tawa ijo ale pi lawa jan. jan li wile toki e sona suli kepeken tokipona la jan li wile kepeken kulupu nimi.
sitelen SONKO li jo e ijo pona mute. taso sitelen LASINA li jo e ijo pona mute ante e wawa ante. toki ante pi tokipona li pona. ona ale li sama sitelen SONKO. taso tokipona taso li sama sitelen LASINA li jo e wawa ante sama sitelen LASINA. wawa ni li seme?
nanpa wan la, tokipona li jo e nimi pi mute lili. ni la jan li ken kama sona e tokipona kepeken tenpo lili.
nanpa tu la, tokipona li jo ala e nimi suli nasa. toki mama la nimi suli li nasa tan ni: jan li kepeken ona la ken la jan li sona ala e kon ona. jan li kute e nimi suli ona li ken toki eni : “mi sona e kon pi nimi ni.” taso ona li sona ala. jan li kepeken tokipona la ona li wile sona pona e kon. jan li kepeken tokipona lon nasin pona la jan ante li sona pona e kon pi toki jan.
nanpa tuwan la, tokipona li jo e nimi pi mute awen. sina ken toki eni : “ni li sama toki sina nanpa wan.” ala, ni li ijo ante. toki sin mute li jo e nimi pi mute lili. taso toki sin mute la sina ken pali e nimi sin kepeken nasin ni: sina wan e nimi mute anu kalama mute. taso tokipona li sama sitelen LASINA. nanpa pi sitelen ale pi sitelen LASINA li awen. sama ni la nanpa pi nimi ale pi tokipona li awen.
awen pi mute nimi li pana e wawa ante tawa tokipona tan ni: jan pi tokipona li pilin eni : “mi ken pona e sona ale. mi lukin e ijo nasa sin la mi pilin ike ala tan ona. mi sona eni : mi kama sona e ona la mi ken pona e ona kepeken nimi pi tokipona.”
jan li ken kepeken nimi pi mute awen tawa ijo ale. ni li nasin suli. ken la kama sona pi nasin ni li wile e wawa lawa mute. taso pini la sona pi nasin ni li weka e sona pakala tan lawa jan. sona pakala li ni: “nimi ijo en ijo li sama. ijo wan li jo e nimi wan. nimi wan li tawa ijo wan.” jan pi tokipona li weka e sona nimi pakala ni tan lawa ona. ona li kama sona e sona nimi pona. sona nimi pona li ni: nimi li ilo toki taso.
ni li suli tan seme? pilin en sona jan li sama soweli. soweli li wile tawa ma ale. soweli li wile ala awen lon poki. soweli li ken ala tawa tan poki la ona li pilin ike. poki ike ni li sama sona nimi pakala. jan li jo e sona nimi pakala la pilin ona en sona ona li ken ala tawa ijo sin ale. sona nimi pona li ni: nimi li poki ala, nimi li ilo. nasin pi tokipona li pana e sona wawa ni tawa jan.
2021-06-16 la mi ante e lipu ni. tenpo kama ona la mi ante ala.