lipu pi jan Telakoman

Project maintained by joelthomastr Hosted on GitHub Pages — Theme by mattgraham
sitelen Lasina sitelen-pona sitelen pona pona   sitelen telo Literal English

tomo  >  lipu ni

toki suli nanpa luka luka luka pi lipu sewi pi jan Luka

sina sona ala e lipu pi jan Luka la mi o pana e sona lili tawa sina. jan Luka li jan pi kulupu pi jan Jesu Kiso, li sitelen e lipu tawa ni: lipu ni li pana e sona pi jan Jesu tawa jan ale.

jan Jesu li lon ma lon tenpo pini suli. jan Jesu li jan pi ma Isaje. ma Isaje la lipu sewi li toki e ni: “tenpo kama la sewi li pana e jan suli tawa kulupu Isaje. tenpo kama la jan ni li lawa e kulupu Isaje kepeken wawa sewi.” jan Jesu li tawa ma tomo mute lon ma Isaje li toki e nasin sewi li kepeken wawa sewi li toki e ni: “lipu sewi li toki e jan suli kama. mi jan suli ni.” taso jan sona mute pi nasin sewi li pilin ike tan jan Jesu.

toki suli mute li lon insa pi lipu pi jan Luka, lipu mi ni la mi pana e toki suli wan taso. mi ante toki e ona tan ni: toki suli ni li pana e pilin pona tawa mi. mi ante toki la mi alasa e ni: “jan Luka li sona e toki pona la ona li kepeken nimi seme?”

toki lili ale li jo e nanpa. mi pana e nanpa pi toki lili kepeken sitelen lili lon sewi. toki mute la nimi li pana ala e sona wile ale. ni la mi pana e sona ante pi nimi ni lon noka lipu.

nanpa wan tenpo ni la jan mute pi kulupu mani1 en jan mute pi pali ike li kama tawa poka pi jan Jesu tan ni: ona li wile kute e ona.  nanpa tu jan mute pi kulupu Pelise2 en jan sitelen mute pi lipu sewi li lukin e ni. jan ni li lukin e jan kama la ona li toki e ni kepeken kalama lili ike: “jan pi pali ike li kama la jan wan ni li lon e jan ike ni lon poka ona. jan ni en jan ike ni li moku lon poka.”  nanpa tu wan ni la jan Jesu li lukin pana e sona tawa ona kepeken toki ni pi ijo ante:  nanpa tu tu “jan li ken jo e kulupu suli pi soweli walo3. soweli pi mute ni li ken lon kulupu ni: ale. sina jo e soweli pi mute ni la soweli wan li kama weka la sina pana e kulupu soweli tawa ma wan, sina weka tan kulupu, sina alasa e soweli weka wan. sina lukin ala e soweli ni la sina pini ala e alasa. jan wan pi sina ale li toki ala toki e ni: ‘mi pali ala e ni’?  nanpa luka sina kama lukin e soweli weka la sina pana e ona tawa sewi pi sijelo sina, tawa monsi pi lawa sina. ni la sina pilin pona.  nanpa luka wan sina kama lon tomo la sina toki tawa jan pona sina, tawa jan pi tomo poka. sina kama e ona ale tawa poka sina. sina toki e ni: ‘o pilin pona sama mi, tan ni: soweli mi li weka, taso mi alasa, mi jo sin e ona!’  nanpa luka tu mi toki e ni tawa sina: sama ni la jan pi pali ike li ante pilin la pilin pona a li lon ma sewi. ken la kulupu suli la jan ale pi kulupu ni li pali pona li wile ala e ante pilin. ken la mute pi jan ni li ni: jan wan li kama la mute jan li kama ale. ma sewi la pilin pona tan kulupu ni li lili lon poka pi pilin pona ni: jan wan pi pali ike li ante pilin.”

nanpa luka tu wan “anu ni la sina toki e seme?: meli wan li jo e mani sike luka luka. mani wan la meli li weka e sona ni: mani ni li lon seme? ni la meli li seli e ilo suno li weka e ijo lili ale tan supa noka tomo kepeken ilo li alasa e mani ni. ona li lukin ala e mani la ona li pini ala e alasa. meli seme li pali ala e ni?  nanpa luka tu tu meli ni li lukin e mani la ona li toki tawa jan pona ale, tawa jan pi tomo poka. meli li kama e ona ale li toki e ni: ‘o pilin pona sama mi tan ni: mani mi li lon ala la mi alasa e ona, mi lukin sin e ona!’  nanpa luka luka mi toki e ni tawa sina: sama ni la jan kon wawa ale pi jan lawa sewi li pilin pona tan ni: jan wan pi pali ike li ante pilin.”

nanpa luka luka wan ni la jan Jesu li toki e ni: “tenpo wan la mije wan li lon. mije ni li mama e jan tu.  nanpa luka luka tu jan sin nanpa tu li toki e ni tawa mama ona: ‘mama o. ijo mute pi ijo ale sina li wile kama tawa mi lon tenpo kama. o pana e ijo ni tawa mi lon tenpo ni.’ ni la mama li kulupu e ijo ale ona lon kulupu tu li awen e kulupu nanpa wan tawa jan sin nanpa wan li pana e kulupu nanpa tu tawa jan sin nanpa tu.  nanpa luka luka tu wan tenpo suno pi mute lili li kama, li tawa. ni la jan sin nanpa tu li kama jo e ijo ale ona li tawa ma weka. ma ni la jan sin li weka e ijo ale ona tan ni: ona li kepeken mani mute lon tenpo ale.  nanpa luka luka tu tu jan sin li pini e mani ale ona la tenpo ike a li kama lon ma ni. moku li lon ala. jan sin li jo ala e wile pi sijelo ona.  nanpa luka luka luka ona li tawa poka pi jan wan pi ma ni li awen lon poka ona. jan ni li tawa e jan sin tawa ma moku ona tawa ni: ona li lawa e soweli jaki4.  nanpa luka luka luka wan soweli jaki li moku e kili linja pimeja. jan sin li wile moku e kili ni. jan ala li pana e ijo tawa ona.”

nanpa luka luka luka tu “ni la jan sin li kama sin e sona li toki e ni: ‘mama mi li jo e jan pali mute. ona ale li jo e pan mute a. taso mi moli lon ni tan ni: mi jo ala e moku!  nanpa luka luka luka tu wan mi o kama lon sewi ma kepeken noka, o tawa mama mi, o toki e ni: “mama o, sewi en sina la mi pali e ike.  nanpa luka luka luka tu tu mi en sina la jan ante o toki ala e ni: mi jan sina, sina mama mi. mi ken ala ni tan ni: mi ike. o toki e ni: mi o sama jan pali sina.”’”

nanpa mute “ni la jan sin li kama lon sewi ma kepeken noka li tawa mama ona. pini nasin la ona li awen tawa, taso tenpo ni la ona li kama ala tawa poka tomo, ona li lon weka. mama li lukin e jan sin lon weka la ona li pilin ike suli tan pakala sijelo pi jan sin. mama li tawa poka pi jan sin kepeken wawa mute, kepeken tenpo lili. mama li selo e sijelo pi jan sin kepeken luka ale ona, kepeken sijelo ona. mama li uta e jan sin kepeken olin suli.  nanpa mute wan ni la jan sin li toki e ni: ‘mama o, sewi en sina la mi pali e ike. mi en sina la jan ante o toki ala e ni: mi jan sina, sina mama mi. mi ken ala ni tan ni: mi ike.’  nanpa mute tu taso mama li toki e ni tawa jan pi tomo ona: ‘o pali e ni lon tenpo lili a: o kama e len sijelo pi pona nanpa wan, o len e sijelo pi jan mi ni kepeken len ni! o pana e sike pi mani mute tawa palisa luka ona! o pana e poki noka tawa noka ona!  nanpa mute tu wan o kama e soweli mani pi sijelo pona, o moli e ona tawa moku! mi ale o moku, o musi  nanpa mute tu tu tan ni: tenpo pini la jan mi ni li moli, taso tenpo ni la ona li kama lon. tenpo pini la ona li weka li pakala, taso tenpo ni la mi lukin e ona.’ ni la jan ale ni li open e musi.”

nanpa mute luka “taso tenpo ni la jan sin nanpa wan li lon ma pan. jan ni li kama la ona li kama lon weka lili tawa tomo la ona li kute e kalama musi e tawa sijelo musi.  nanpa mute luka wan ni la jan sin nanpa wan li kama e jan pali wan tan tomo tawa poka ona li toki e ni: ‘ni ale li seme?’  nanpa mute luka tu jan pali li toki e ni: ‘jan sina pi mama sama li kama. mama sina li moli e mani pi sijelo pona tan ni: jan sin ona li kama sin tawa ona la sijelo pi jan sin li pakala ala.’  nanpa mute luka tu wan taso jan sin nanpa wan li pilin ike wawa li wile ala tawa insa tomo. ni la mama ona li kama tan tomo tawa poka ona li open e toki pona tawa ni: jan sin li kama tawa insa tomo.  nanpa mute luka tu tu ni la jan sin li toki e ni tawa mama: ‘o lukin! tenpo sike suno mute a la mi pali e pali sina. sina toki e pali tawa mi la mi pali e ni. tenpo ala la mi pali ala e pali pi toki sina. taso tenpo ala la sina pana e soweli walo lili tawa mi tawa ni: mi en jan pona ale mi li musi.  nanpa mute luka luka taso jan sina ni li moku e ijo ale sina kepeken meli unpa esun. ona li kama la sina pali e ni tawa ona: sina moli e mani pi sijelo pona!’  nanpa mute luka luka wan ni la mama li toki e ni tawa ona: ‘jan mi o, tenpo ale la sina lon poka mi, ijo ale mi li ijo sina.  nanpa mute luka luka tu taso ni li wile: mi ale li musi li pilin pona. ni li tan ni: jan sina pi mama sama li moli, taso tenpo ni la ona li lon sin. ona li weka tan lukin, tan sona. taso tenpo ni la mi lukin e ona.’”

lawa pi lipu ni

2023-10-20 la mi ante e lipu ni. tenpo kama ona la mi ante ala.

  1. jan pi kulupu mani li kulupu e mani wile tan jan ma li pana e mani ni tawa kulupu lawa. ↩

  2. kulupu Pelise la pali wile mute li lon tawa nasin pi lipu sewi. kulupu ni li pilin e ni: “jan ante li ike, mi pona a lon nasin sewi.” ↩

  3. soweli walo li pana e telo moku walo tawa jan. nasin wan pi soweli walo la jan li kama jo e linja mute tan selo sijelo ona li pali e len kepeken linja ni. ↩

  4. soweli ni li soweli moku li jo e nena sike pi loje walo lon sinpin ona li pana ala e telo walo moku tawa jan li moku e jaki. kulupu mama pi jan Jesu la lipu sewi li toki e ni: soweli ni li jaki, o moku anu luka ala e soweli ni. ↩