lipu pi jan Telakoman
Project maintained by joelthomastr Hosted on GitHub Pages — Theme by mattgraham
| sitelen Lasina | sitelen-pona | sitelen pona pona | sitelen telo | Literal English |
tomo > lipu ni
jan li ken pana e sona ale kepeken tokipona
mi en jan [KAPU] (Gabriel Mizrahi) li pona e lipu ni.
mi toki eni lon lipu ni:
- jan li kepeken tokipona la ni li pona tawa ona tan seme
- jan mute li toki eni : jan li ken ala toki e ale kepeken tokipona
- toki ni li lon anu seme
- nasin pana pi sona suli kepeken tokipona
- toki pini
jan li kepeken tokipona la ni li pona tawa ona tan seme
tokipona li toki sin. toki sin li seme? toki sin anu toki pali li ni: jan li pali e toki sin kepeken lawa ona. jan li kama sona ala e toki sin tan mama ona.
toki sin mute li lon. taso tokipona li sama ala toki sin ante. ni li tan seme? ante la jan li kepeken tokipona la ni li pona tawa ona tan seme
tenpo pini mute la jan [SONJA] li toki eni lon lipu: tokipona li pona tan seme? lipu ni la jan [SONJA] li toki e ijo pona mute pi tokipona. ijo wan pi ijo pona mute li ni: jan li wile kepeken tokipona la ona li wile sona eni : sona seme li lon insa pi toki ona? jan li sona ala eni la ona li ken ala toki kepeken tokipona.
mi pilin eni : toki ni pi jan [SONJA] li lon. toki mama la toki ni li lon ala. jan li kepeken toki mama la ken la ona li sona ala eni : sona seme li lon insa pi toki ona
toki mama li sama tomo tawa. jan mute li ken kepeken tomo tawa. taso insa sinpin pi tomo tawa la ilo tawa pi tomo tawa li lon. jan pi mute lili li sona eni : seme li lon insa pi ilo tawa ni? ilo tawa li tawa e tomo tawa kepeken nasin seme? jan pi mute lili li sona eni.
toki mama li sama ni. jan mute li sona e nasin ni: ona li kepeken toki mama tawa wile ona. ona li kama jo e ijo wile ona la ona li pilin pona. taso ken la ona li sona ala eni : sona seme li lon insa pi toki ona
toki mama la ni li ken lon tan seme? jan li kepeken toki mama la ona li kepeken nimi mute. tenpo mute la nimi tu li jo e kon sama. taso jan li sona ala eni. insa pi lawa ona la ona li toki eni : “nimi mute li lon. ni la ijo mute li lon.” taso lon la ijo wan li lon.
toki mama li jo e nimi mute tawa kon sama. ni li ike tan seme? ni li ike tan ijo mute. mi pana e ijo tu tan ijo muteni.
ijo nanpa wan li ni:
jan li sona lili e kon nimi la sona ona li ken pakala. jan li wile sona eni : seme li lon? seme li lon ala? taso jan li sona lili e kon nimi la ona li ken sona ala eni. jan li sona ala eni la ona li ken ala pali e pona tawa ona sama anu jan ante.
ijo nanpa tu li ni:
tenpo mute la jan li sona e toki pi jan ante lon toki mama. taso sona ona li pona ala. ken la nimi wan li pana e sona suli anu sona mute. ken la sona ni li ante lon insa lawa pi jan ante.
jan li kepeken nimi suli la ona li ken pakala. jan nanpa wan li toki e ijo kepeken nimi suli la jan nanpa tu li toki eni lon insa pi lawa ona: mi sona enimi suli ni. taso ken la sona ona pi nimi suli li sama ala sona pi jan nanpa wan. jan nanpa tu li toki eni tawa jan nanpa wan: mi sona e toki sina. taso jan nanpa tu li sona ala. sona ona li sona pakala.
tenpo kama la jan nanpa tu li pali pakala tan ni: ona li kepeken sona pakala. sona ona li pakala tan ni: jan nanpa wan li kepeken nimi suli la jan nanpa tu li sona ala e kon pi nimi suli ni. taso jan nanpa tu li sona ala eni : sona ona li pakala tan seme
jan li kepeken tokipona lon nasin pona la ijo ike tu ni li lon ala.
taso wile sona ni li lon: jan li ken ala ken toki e ale kepeken tokipona
jan mute li toki eni : jan li ken ala toki e ale kepeken tokipona
lipu pi jan [SONJA] la ona li toki eni : ijo suli mute li lon sama ni: jan li ken ala pana e sona ona kepeken tokipona. jan [LOPE] li toki sama ona.
jan [SONJA] en jan [LOPE] li sona pona e tokipona. mi jan sin pi tokipona. taso toki ni li ike tawami. toki ni li lon la mi pilin ike. mi wile eni : toki ni li lon ala. mi pilin eni tan seme
tokipona li sama tomo. tomo li jo e lupa kama e lupa lukin e selo poka e selo lawa. taso jan li pali e tomo sin la ona li open e pali ona lon nasin ni: ona li pali e supa kiwen lon ma. ni li wawa e noka tomo. nanpa wan la jan li pali e supa noka pona. tenpo kama la ona li pali e selo poka e selo lawa e lupa kama e lupa lukin. supa noka li awen e ijo ante ale lon tomo.
tokipona li jo e supa noka sama ni. jan [SONJA] en jan mute ante pi tokipona li pali e tokipona la ona mute li jo e toki suli. ona mute li pali e tokipona la toki suli ni li pana e nasin tawa ona mute. toki suli ni li pona la toki suli ni li pana e nasin pona. nasin li pona la tokipona li kama pona. mi toki eni : toki suli ni li sama supa kiwen pi noka tomo. toki suli ni li supa noka pi tokipona.
supa noka pi tokipona li seme? ijo mute li lon supa noka pi tokipona. ijo wan li ni: sona suli pi lawa jan li suli lukin taso. sona pi suli lukin li suli ala. lon la sona pi suli lukin li kulupu pi sona lili mute.
jan li toki eni la mi pilin ike: tokipona li ken ala pana e sona ale. mi pilin ike tan ni: toki ni li utala e supa noka pi tokipona.
taso jan mute li toki eni : jan li ken ala pana e sona suli kepeken tokipona. ni li lon la mi pilin eni : tokipona li pona ala tawa supa noka ona. taso mi toki eni : jan li ken pana e sona suli ale kepeken tokipona.
toki ni li lon anu seme
jan li ken ala ken toki e sona lili kepeken tokipona? ona li ken. ona li ken ala ken pana e linja tan sona lili tawa sona lili ante? ona li ken. ona li ken ala ken kulupu e sona mute kepeken nasin ni? ona li ken.
ni li lon la jan li ken pana e sona suli kepeken tokipona. taso jan mute li toki eni : jan li ken ala. ona mute li toki eni tan seme
ken la ona mute li toki eni tan ni:
jan li wile toki kepeken tokipona la ona li toki lon insa pi lawa ona kepeken toki mama. ken la ona li alasa enimi anu kulupu nimi wan pi tokipona tawa nimi wan pi toki mama. kulupu jan mute pi tokipona la mi lukin eni : jan li toki sama ni tawa jan sona pi tokipona: “mi toki eni kepeken tokipona la mi wile kepeken nimi seme?” jan sona li pana enimi pona tawa ona.
taso tenpo mute la ni li lon: jan li kepeken nimi pona lon tokipona la jan ante li sona ala e toki ona. ni li tan ni: tokipona la nimi wan li nimi pona tawa ijo ante mute. tenpo mute la ni li lon: jan nanpa wan li kepeken nimi pona. taso jan nanpa tu li sona ala eni : jan nanpa wan li kepeken nimi ni tawa ijo seme? kon toki pi jan nanpa wan li seme
pini la jan mute li toki eni : jan li ken ala pana e sona suli kepeken tokipona. taso mi la toki ni li lon ala.
mi jan pi ante toki. ni li pali mi tawa mani. mi pali e ante toki la mi pali eni : mi lukin e lipu. mi kama jo e sona pi lipu ni. mi sitelen e sona sama lon toki ante. mi ken pali e ijo sama lon nasin toki uta. mi pali e pali ni lon tenpo mute.
jan pi ante toki li lukin enimi la ona li wile pana e kon sama lon nasin toki ante. ona li toki eni : nimi ni li pana e sona seme? taso jan pi ante toki li ken ala pali eni taso. ante la ona li wile toki eni : nimi ni li pana e sona seme lon poka pi toki ante ale lon lipu ni
nimi li sama poki pi ijo sona mute. jan li toki la ona li kepeken nimi. jan li kepeken nimi wan la ona li wile pana e ijo sona wan. taso ona li wile pana e ijo sona wan taso tan insa poki. tenpo wan la ona li pana e ijo sona wan tan insa poki. tenpo ante la ona li pana e ijo sona ante tan insa poki.
jan tu li toki la jan nanpa wan li kepeken nimi. jan nanpa tu li wile sona eni : jan nanpa wan li wile pana e ijo sona seme tan insa poki pi nimi ni? jan nanpa tu li ken sona eni kepeken nasin seme? jan nanpa tu li lukin e toki ale pi jan nanpa wan. jan nanpa wan li toki ala kepeken nimi wan. ona li kepeken nimi mute lon toki ona. jan nanpa tu li lukin e toki ale pi jan nanpa wan la ona li ken sona eni : jan nanpa wan li pana e ijo sona seme tan insa poki nimi.
tokipona la ni li sona suli. jan li sona ala e sona suli ni la ona li ken pakala. ni li sona suli tan seme? nimi wan pi toki mama li sama poki lili pi ijo sona. mute pi ijo sona ni li lili. taso tokipona la nimi wan li sama poki suli pi ijo sona. mute pi ijo sona ni li mute.
toki mama la jan nanpa wan li ken toki lili. jan nanpa tu li ken sona e kon pi toki ona. taso tokipona la jan nanpa wan li wile toki mute. jan nanpa wan li toki lili la jan nanpa tu li ken ala sona e kon pi toki ona.
nasin pana pi sona suli kepeken tokipona
sona suli li sama poki suli pi ijo lili mute. jan li luka e poki ni la ona li toki eni : “poki ni li suli a, mi ken ala tawa e ona.” taso ona li open e poki la ona li lukin eni : ijo lili mute li lon insa poki. jan li ken weka e ijo lili ni tan poki. tenpo kama la ona li sona eni : poki suli ni li suli lukin taso. lon la ona li suli ala.
jan li ken tawa e poki suli kepeken nasin ni: ona li open e poki li tawa e ijo lili. tenpo kama la ona li tawa e poki. tenpo kama la ona li ken pana sin e ijo lili tawa insa ona.
mi toki eni : jan li ken pana e sona ale kepeken tokipona. taso jan li wile kepeken nasin pona tawa ni.
o pana e lawa sina tawa ni taso: jan lukin li kama sona e seme
pali pi ante toki li nasin seme? jan mute li sona pona ala e pali pi ante toki. jan mute li toki eni : mi pali pona e ante toki la mi wile kepeken nimi pi mute sama lon toki nanpa tu. mi wile kepeken linja toki pi mute sama lon toki nanpa tu. lipu lon toki nanpa wan li kepeken toki lili la lipu lon toki nanpa tu li wile kepeken toki lili sama. lipu lon toki nanpa tu li wile kepeken nimi pi mute sama tawa pana pi sona sama. taso ni li lon ala.
ijo suli li ni taso: jan li lukin e lipu pi toki nanpa wan la ona li sona anu pilin e ijo wan. jan li lukin e lipu lon toki nanpa tu la ona li sona anu pilin e ijo sama anu seme? pali pi ante toki la ni taso li suli. ijo ante li suli ala. mute toki anu mutenimi anu mute pi linja toki li suli ala.
sina pali e pali pi ante toki lon tokipona la o weka ala e sona ni tan lawa sina.
o alasa ala e kulupu nimi wan lon tokipona tawa nimi wan pi toki mama sina
o alasa ala enimi anu kulupu nimi wan tawa nimi pi toki mama sina. o alasa e nasin pona pi pana sona.
nimi pi toki mama sina li sama poki suli. o open e poki suli ni. o lukin e ijo sona mute lon insa ona. o weka e ijo wan. o pana e sona pi ijo wan ni lon tokipona.
o lukin sin e insa pi poki suli. o weka e ijo wan sin. o pana e sona pi ijo ni lon tokipona. o pali eni tawa ijo lili ale lon insa pi poki suli.
pini la o kulupu e sona pi ijo lili aleni lon tokipona.
o toki ala eni : mi kepeken nimi mute la ni li ike
toki mama la ijo ale li jo enimi. mi toki e ijo kepeken toki mama la mi ken kepeken nimi ona. taso tokipona la mi wile pana e kulupu nimi sin tawa ona.
ken la jan lukin li sona e lipu pu taso. mi wile eni : jan sama ni li ken sona e kon pi toki mi kepeken wawa lawa lili. ni la mi wile pana e sona pi kulupu nimi sin ale.
tawa ni la mi wile sitelen enimi mute. mi kepeken toki mama la mi ken kepeken nimi pi mute lili. taso tokipona la mi wile sitelen enimi pi mute suli. ni li nasa lukin ala tan ni: ni li nasin pi tokipona.
insa pi toki mama la nimi pi mute seme li lon? toki mama ale li ante. toki [INLI] la jan mute li toki eni : toki [INLI] li jo enimi pi muteni : tenpo ale ale la ale. ni la nimi wan pi toki mama li ken pana e sona mute. ni la sina ken pana e sona kepeken nimi pi mute lili.
taso tokipona la nimi pi mute seme li lon? mutenimi pi tokipona li sama ni: ale mute luka. ni la nimi wan pi tokipona li ken pana e sona lili taso. ni la mi wile kepeken nimi mute tawa pana sona.
jan li kepeken nimi mute lon tokipona la ni li nasa ala. mi la toki sama ni li nasa: “mi ken kepeken nimi wan lon tokipona tawa nimi wan pi toki mama. jan lukin li ken sona e kon pi toki mi.”
o toki ala eni : mi kepeken nimi mute lon tokipona la ni li ike. sina wile pana e sona kepeken tokipona la nasin ante li lon ala.
toki pini
mi toki eni : jan li ken pana e sona ale kepeken tokipona. taso tawa ni la ona li wile kepeken nasin pona.
mi toki eni : sina sitelen e lipu lon tokipona la ijo suli li ni: jan li sona e lipu pu taso la ona li ken ala ken sona e kon pi toki sina
tawa ni la o toki ala eni : “mi kepeken nimi wan tawa nimi wan pi toki mama mi la ni li pona.” tokipona li jo enimi pi mute lili. nimi wan li ken ala pana e sona mute.
o toki ala eni : “mi kepeken nimi mute la ni li ike.” nasin pona pi tokipona li wile eni.
sona suli li lon ala. sona pi suli lukin li ni taso: poki suli pi sona lili mute. toki wan la o pana e ijo sona lili. sina pana e ijo sona lili ale la o pana e linja lon insa pi ona ale. kepeken nasin ni la sina ken pana e sona ale kepeken tokipona!
2020-11-30 la mi ante e lipu ni. tenpo kama ona la mi ante ala.