lipu pi jan Telakoman


Project maintained by joelthomastr Hosted on GitHub Pages — Theme by mattgraham
sitelen Lasina sitelen-pona sitelen pona pona   sitelen telo Literal English

tomo  >  lipu ni

ma pi nimi pona

mi pana e lipu ni lon lipu tenpo nanpa mun

jan lukin o, kama pona lon ma sin. ni li ma pi nimi pona. mi tawa, mi alasa e nimi. o kama lon poka mi, sina ken lukin e nimi pona sama mi!

o lukin! ni li nimi KASI. ona li ken ala toki, taso ona li pilin pona.

ona la tenpo li ijo lili. mi en sina la tenpo li ijo suli. tenpo suno wan li tenpo suli. taso nimi KASI la tenpo suno li sama seme? sijelo sina la pilin li lon. pilin sina li kalama lon tenpo ale tawa ni: ona li pana e telo loje tawa sijelo sina. kalama pilin wan li tenpo lili tawa sina. taso nimi KASI la tenpo suno li tenpo lili sama kalama pilin!

nimi KASI li pali ala. ona li awen lon ma ona li lukin e suno li moku e wawa suno e telo tan ma. ona li toki insa ala e tenpo kama.

o lukin! ni li nimi KILI. nimi KILI li kama tan nimi KASI. ona li suwi lukin li jo e kule mute. taso ona la tenpo li ijo suli. ona li kama lon ma la ona li jo e tenpo suno pi nanpa lili. ona li ken ala awen lon tenpo suli. ona li wile ante.

taso tenpo kama la ona li seme? ona li ken pana e moku tawa ijo ante. ken la soweli li lukin e ona li moku e ona. soweli li lukin ala la ona li ken kama nimi KASI sin. tawa ni la ona li wile kama lon ma pona. ona li lon ala ma pona la pipi anu jaki lili li moku e ona. sijelo ona li pona e ko ma.

nimi KILI li sona ala e ale ni. ona li sama nimi KASI li toki insa ala e ni. ona la ale li pona.

o lukin! noka pi nimi KASI pi nimi KILI la nimi KO li lon. nimi KO li lon ma mute li jo ala e sijelo. ona li awen lon tenpo ale. nimi KO li jaki lukin. taso ona li jaki ala. ona li pana e ijo wile mute tawa nimi KASI. nimi KASI li moku e wawa suno, taso ona li pali e sijelo ona la ona li kepeken ijo pi nasin mute tan nimi KO. nimi KASI li pana e moku tawa ijo ante ale.

ante la nimi KO li pana e ko pi nasin mute. nasin tu pi nasin mute ni li ni: ko kiwen en ko pimeja. jan li kepeken ko tawa ijo mute. ilo mute li tan ko kiwen li tawa kepeken ko pimeja.

jan mute li sona ala e suli pi nimi KO. taso ona li sama nimi KASI anu nimi KILI. ona li sona ala li toki insa ala e tenpo kama. ona la ale li pona.

mi en sina o tawa tomo. mi wile moku, mi wile lape. tenpo suno ante la mi en sina o alasa e nimi ante lon ma pi nimi pona.

2021-03-10 la mi ante e lipu ni. tenpo kama ona la mi ante ala.