lipu pi jan Telakoman

---

Project maintained by joelthomastr Hosted on GitHub Pages — Theme by mattgraham

sitelen Lasina

sitelen-pona

sitelen pona pona

sitelen telo

Literal English

tomo  >  lipu ni

toki pona li sama ala sitelen SONKO

mi pana e lipu ni lon lipu tenpo nanpa mun

toki pona li nasin toki suwi. taso mi la toki pona li ni taso ala. toki pona li nasin sin pi toki insa. kepeken ona la jan li ken pona e sona ale.

mi ken toki e ni: “toki pona li seme? toki pona li ni.” taso nasin ni li musi ala li pona ala. mi wile kepeken nasin ni: “toki pona li sama seme? toki pona li sama ni.” nasin ni pi pana sona li musi li pana pona e sona.

open la mi wile toki e ni: nasin toki li sama seme? nasin toki li sama nasin sitelen. ni li tan seme? nasin sitelen la jan li kepeken sitelen tawa nimi. nasin toki la jan li kepeken nimi tawa ijo pi lawa jan. ijo pi lawa jan li sona anu pilin anu wile.

ni la, toki pona en nasin toki ante li sama nasin sitelen seme? toki ante li sama sitelen SONKO. sitelen SONKO la sitelen ante li lon tawa nimi ale. toki ante pi toki pona li sama ni. toki ante li jo e nimi ante tawa ijo ale pi lawa jan.

ni la toki ale li sama sitelen SONKO, taso toki pona li sama sitelen LASINA. sitelen LASINA li jo e sitelen wan tawa kalama ale. jan li wile sitelen e nimi la ona li wile kepeken kulupu pi sitelen kalama. ni li sama toki pona. toki pona li jo ala e nimi ante tawa ijo ale pi lawa jan. toki pona la jan li wile kepeken nimi mute tawa pana pi ijo lawa.

sitelen SONKO li ike ala li nasin pona tan ijo mute. taso sitelen kalama sama sitelen LASINA li jo e wawa ante. toki pona li jo e wawa ante sama ni. tenpo ante la mi wile toki e ni.

2021-03-07 la mi ante e lipu ni. tenpo kama ona la mi ante ala.